嫌命好

陶傑今日講女性減肥。俾錢減肥之風在港大盛，張玉珊檔o野可以做到上市，呢位小姐，真係唔簡單，比起一出道已成日話要退出娛圈做生意卻做得個桔出來的楊采尼，高出不知多少倍。

減肥公司廣告，已經多到麻木，任何過去40年內出過o下鏡的過氣演藝界肥女士，亦通通穿三點式展露減肥成果，亦已經嘔到麻木。正如倪震在電台說過，攪乜鬼數碼港、中藥港都係假，自由市場自有其路向，而香港竟然變了個纖體港！

有消費者，才有供應者。有女士們肯奉獻$$，才會有咁多減肥專門店、減肥食品。小弟愚魯，頭腦好簡單，一向不明白減肥為何要借助外力：少吃，就自然會瘦，唔食多過消耗量，自然唔會肥！

點解富裕社會肥人多？當然是因為人人有得食，唔憂食。大把地方d人食都食唔飽，想肥都難；你d富裕社會肥人就嫌命好，一路食到腦滿腸肥一路仲有閒錢去搵人幫你減肥。係咪好諷刺呢？

肥，是褔氣，而不是恥辱。中國一向稱肥為「褔相」，自有其理。老實說，hk真正過肥的人，一向不多，最窮奢極侈的美國才多。