母回內地陪工作中的父，臨走交帶：你老豆叫人在美國速遞寄左d膽o黎，得閒回老家收收信，留意下通知咭，咁o岩o係度就更好啦，唔係就記得去郵局幫佢拿…（大概該國郵政有攪速遞的，就係咁通過相互郵局交收吧）

我聽見馬上一寒，上次佢地去美國，又係粒聲唔出寄速遞回來，我發現張咭時已經只剩一日限期，翌日又不在此區，於是狼狽地托相熟書店老細代取，好彩人地有義氣，唔係由天水圍仆來炮台山收個包裹都幾係o野！

這種甚麼快遞服務，張通知咭絕對令我抓狂，首先佢話派過兩次冇人收，至會放咭。但那兩次是在一晝內，咁即是把鬼？你唔好隔10秒又來派第二次？

兼，唔會上門，只會按對講機。喂，我部機壞左，或者細聲聽唔倒，或者我以為白撞唔鬼理，唔得架？你上o下o黎按o下鐘會腳跛呀？

好，預左你留張咭。咭上面呢，個郵局地址的印糢糢糊糊，用力d好冇？仲要小心睇清楚係邊間，因為未必係最近收件人地址那間；起碼我兩次都唔係，一次上一個mtr，一次下一個mtr。

跟住，要由派咭日起7日內去拿。但派咭翌日至有得拿喎。咁7日內，係由邊日起計？我X！

掛號信係14日內，仲有埋電話可以打去延期。呢項速遞服務呢，冇留電話，冇話可否延期，總之你遲就你賤。

今次總算一切順利，老爸的寶貝到手，膽喎，hi fi用o個d，雖然其實有次d膽燒晒佢都聽唔出…在郵局等那位先生左翻右翻時，已蓄勢待發若貨物一有失閃就找人狂插以洩忿氣，結果當然係一聲唔該，皆大歡喜走人…。

不過，奉勸各位，寄掛號信或在外地郵政速遞回來，記得考慮清楚會否對收件人造成不便，和是否有需要；一番功夫至取到手若發覺只係d無謂無聊o野，唔好老脾真係會斬人架。